Fruto de tradiciones milenarias y también de las influencias a las cuales se vieron forzados los judíos de España y más tarde en los países del mediterráneo en los cuales se asentaron después de 1492, el gizado sefaradí se distingue hoy por dos características principales: ésta es una cocina mediterránea en la cual se aúnan armoniosamente las mejores tradiciones gastronómicas de los países del Mare Nostrum y, al mismo tiempo es un guisado judío, profundamente marcado por las tradiciones y las leyes judías.
Salata de Gambas Asadas
Salata de Gambas Asadas
Materiales:
1 kilo e gambas pulpudas
2-3 kucharas de sal godra
2-3 kucharas de azeyte
4 kucharas de vinagre de vino
1/2 kucharika de sal delgada
1/2 kucharika de asukar
Preparasion:
Asar las gambas enriva del gaz o en el gril del orno, asta ke se despega el kuero. Meterlas adientro de una papelera de papel, echar por enriva la sal godra, serrar la bokadura, desharlas una ora i media asta dos oras para ke suden bien i ke el kuero salga mas fasil. Despues enshaguarlas bien debasho del chorro de la fuente para ke salgan todas las pepitas i los kueros, desharlas eskurrir, kortarlaas en dos o tres pedasos i aresentarlas en una bocha. Mesklar la azeyte, vinagre, sal i asukar, echar por enriva de las gambas, serrar bien, meter al frijider. Asperar unos kuantos dias asta ke este pronta. Esta salata tan pastoza es apresiada sobre todo por los djudios de Bulgaria.
Berendjenas fritas kon yogurt
Materiales (4-6 porsiones):
2 berendjenas
2 vazikos de yogurt
2 dientes de ajo pikado o majado
sal
azeyte para friyir
Preparasion:
Lavar las berendjenas sin kitar la kashka, kortarlas en tajadas de medio santimetro, meterlas en un tefsin burakado, echar por ensima sal i desharlas eskurrir una media ora. Despues esprimirlas bien, enshugarlas en una tevaja i friyirlas en la azeyte ke ya fue kaentado de antes. Meter las tajadas fritas sovre un plato i desharlas yelar un poko. Mesklar el yogurt kon el ajo i un poko de sal i echarlo sovre las berendjenas fritas. Servir inmediatamente
Tarator
Materiales (4 porsiones):
3-4 pipinos
4 vasos de yogurt
1 vaso de agua
3 dientes de ajo majado
2 kucharas de azeyte
2 kucharas de prishil pikado
3 kucharas de muez machakada
sal a gusto
Preparasion:
Mudar los pipinos, kortarlos en pedasikos muy chikos i mesklarlos kon el resto del material. Meter al frijider por una ora o dos i servir yelado.
Salsa Ajada
Materiales:
2-3 dientes de ajo
1 vaso de azeyte
1 klara de guevo
1 revanada de pan blanko de 4-5 dias de antes
unas gotas de sumo de limon
un poko de sal
Preparasion:
Ahajar los ajos i meterlos en el mikser (o en un resipiente onde se puede mesklar kon la mano), djuntos kon la miga kitada de la revanada de pan, mojada i bien esprimida. Mesklar todo i empesar a lavorarlo komo se lavora la moyonez, adjustando kada vez una gota de azeyte, una gota de sumo de limon i un poko de klara de guevo asta ke la azeyte empesa a embeverse. Despues se puede meter la azeyte a media kucharika i mas, despues a una kucharika kada vez, asta ke la ajada se ata bueno i se aze komo una krema. Se kome kon igado frito, kon alguenga yelada o kebap de karne.
Del libro EL GUIZADO SEFARADÍ
Autores MOSHE SHAUL, ALDINA QUINTANA RODRÍGUEZ y ZELDA OVADIA
Editorial CERTEZA
No hay comentarios:
Publicar un comentario